快樂嘅時光總是過得特別快，

四日嘅旅程轉眼已到了最後一日

陽光普照嘅一日

今早同樣是細細粒最早起床，亦由我負責 room service

呢日下午一點半就要前往機場，所以時間有限

十點幾起行往 Central World 逛街，影影相；主攻 Isetan 超市，嘩！阿哈和高妹又大手掃貨呀！

途經家品部，高妹睇中一個空氣淨化機，千幾蚊，心思思想買

既然都係時間要返酒店 check out，稍後會再折返，比時間佢唸下喇！

返回酒店，收拾細軟，將之寄存；三人又再次出動，去邊？去醫肚吖！

細細粒係 day 2 遊記曾經提及鄰近酒店嘅 Peninsula Plaza 嘅 Provence … 當天食咗個『閉門羹』！！

大家都心心不息，所以係臨走前決意再去一趟 … 果真好好味o架！135 baht 一碗魚蛋粉以當地消費指數嚟講絕對係貴，之不過一場嚟到無理由唔試下！

食完再折返 Central，順道幫襯 Chaho … 時間緊湊

雖則一個簡簡單單嘅午餐，只要係知己共聚，一樣可以食得好開心，好滿足

 呢個就係高妹買咗嘅淨化機

一點幾，摩打腳急步返回酒店取過行李，打的趕抵機場

行李過磅 … 噢！又 overload 吖！去年超重７kg，高妹係 “罪魁禍首"；今次超重９kg，輪到阿哈 “出事" … 又要即場減磅 … 幾經努力，仍未達標 … counter 個靚仔見我哋實在無計可施，隻眼開隻眼閉，好心放過我哋

登機 … 嘩！靚仔畫咗機頭位比我哋呀！係第四行呀！飛咁多次都係第一次坐咋！好興奮啊！

我哋嘅行程就此畫上一個完滿句號

呢堆就係細細粒買嘅手信，一睇就知導致超磅唔關我事喇！

俗語有話，年廿八洗邋遢，唔洗點會發！新年前夕，大掃除絕對走唔甩。

今日係年廿六，細細粒決定 “不靠外援"，自行提早把家居打掃得乾乾淨淨，迎接新一年嘅來臨。

細細粒係一月壽星女，近日飯局一餐接一餐

都好難唔記得自己 …

又大一歲喇！

21/1  Dinner with Elaine @Ichiban Japanese Restaurant @ MK

22/1  Dinner with Karen & Connie @ 霞飛點心拉麵 @K11

23/1  Dinner with Iris, Miko, Angel @ 和民 @ 始創

25/1  Dinner with Bonnie @ Ma Thai @ TKO

26/1  Dinner with Winnie, Harmony, Grace & Benny

　　　　@ Applegreen @ CWB

27/1  Dinner with Dick @ Pink Salmon

28/1  Dinner with Ah Sze @ Sprout Organic and Natural Cafe

　　　　@ The One

今日係細細粒牛一

亦係海洋公園旗艦主題區夢幻水都開幕嘅日子

與 Dick 少去了一趟

走過人工湖，眼前就是雲集 5000 條珍貴魚類嘅「海洋奇觀」

行程第三日，節目一樣豐富 …

今早，細細粒有個特別任務 …

就係去酒店餐廳 pack 早餐，因為我哋入住二人房，只得兩張早餐劵，若然另買一張早餐劵，再三人一齊落餐廳，又有點礙眼 …

早前從別人嘅 blog 知道，呢間酒店可容許住客 pack 早餐上房，所以小妹就負責 room service。講真，餐廳經理真係好 nice，佢幫手 pack 之餘，仲話幫我送上房添！

食完早餐，揸揸臨起行，乘 BTS（Ratchadamri → Phrom Phong），我哋要趕住去 Asia Herb Association 充電呀！

每次來到曼谷，定必心癢癢來個 massage，貪其價錢便宜、環境靜謐優雅以及空間寬敞舒適，而這間由日本人開的 AHA 更是我們三人一致喜愛的 “叉電站"；店子裝修帶和式嘅清雅味道，陳列簡約加上柔和的音樂，氣氛夠 relax。店內更有獨家混合草藥調製的草藥球按摩，是小妹的必試項目，草藥球的熱力加上香味，按摩時分外舒適。今趟是細細粒第三次光顧，一於試個新 package ……

早在出發前，已上網 reserved 了一個 4 小時的項目；安排於行程第三日的上午十點：

Asia Perfect Body & Foot [4 hours] (Regular price 2,500B → 2,250B)

1. Kon nyaku enzyme body scrub 60 min
2. 100% Pure blend oil body massage 60min
3. Organic herbal ball for body 30min
4. 100% Pure blend oil foot massage 60min
5. Head & shoulder massage 30min

http://www.asiaherbassociation.com/

之前兩次光顧都覺得好滿意，沒料今次卻大失所望：

• 1 hour 30 mins ~ foot, head & shoulder massage 安排咗係地下一間三人房，坐在按摩椅，先按腳，後按肩頸，不過按摩過程令人感覺唔舒服之餘，亦感到按摩師不就手，肩頸位根本係按咗等如無按

• 要我哋兩頭騰：按完腳、肩之後，要我哋轉去另一座嘅二樓房間。我哋都幫襯過唔少按摩店，從沒試過要中途轉房，客人好多時係按摩過程中都會眠一眠，怎料到會被叫醒，叫你轉房；更何況 AHA 規模都唔細，加上我哋已經事前預訂好，無理由安排得如此失當

• 個間二樓房超殘舊，好似好耐無人用過咁款，浴室更是殘舊不堪，無熱水、無沐浴液、地下去水位又淤塞，ｄ水倒流入房，真係嚇死人！現在唸起都火滾！！！

• 明知ｄ客 “光脫脫"，間房仲開勁大冷氣，我哋凍到騰騰震，要求將溫度調高；轉過頭，佢哋又較回勁低溫，我哋知道按摩師用力按摩時會覺得熱，會出汗，但我哋係客，總無理由要ｄ客去遷就佢啩！

1500 離開 AHA，係附近 Emporium 嘅 food court 嚟個 quick lunch

之後再到 NaRaYa 逛逛，蝴蝶袋是阿哈的心頭好，雖然第一晚已經係 central 分店 “破咗財"，之不過每間款式總有差異，想找齊目標，總需走訪幾間呢！

＊ 食咗鴨飯同埋湯粉

我哋點解好似咁趕時間？

因為我哋決定再去 JJ market 呀！Oh！Let’s GO GO GO …

BTS（Phrom Phong → Mo Chit）又大半粒鐘

去到 JJ 五點有多，依然十分擠迫，部份有瓦遮頭嘅店舖陸續關閉，流動小販則爭相擺賣 … 逛著逛著，喧鬧嘅市集一下子靜了，國歌奏起，全體肅立；我哋當然都要入鄉隨俗喇！其實細細粒係兩秒後至識得反應，呢次係第一次見到，覺得好搞笑！

我哋今趟主要想買香薰，仲係想搵番去年幫襯過個間，其實昨天已搵過但搵唔到 … 哈！今日居然比我哋誤打誤撞搵得番，依舊係個位 “矇下矇下" 嘅靚仔看舖，價錢貴咗，所以買少咗 … 轉眼間，天黑了，原來已經七點幾，要轉戰 BigC 喇！

由於 Central 對面間 BigC 仲未開番，所以今次要去到鄰近 BTS Saphan Khwai 站分店。

乘 BTS（Mo Chit → Saphan Khwai）只一個站，出站後已看到 BigC 個大招牌，行五分鐘就到；（係商場外買咗 3 個番石榴），先在超市樓下嘅 food court 食晚餐，填飽個肚至有體力掃貨嘛！超市收十點半，真係要分秒必爭！！！

由於時間唔多，我哋都買得好匆忙 … 慣例地，細細粒係買得最少的一個，只用上 315 baht；買得最多係阿哈，幾大袋之餘，仲要 “納" 埋個紙皮箱，睇嚟，阿哈會取代高妹，成為今次曼谷行嘅『出血天后』吖  ^0^

BigC 關門正是我哋離開之時，乘 BTS（Saphan Khwai → Ratchadamri）返酒店去

呢兩位靚女賣梗橙汁廣告？

是晚宵夜：番石榴（超淡）＋大樹菠蘿（超甜）

返抵酒店，阿哈同高妹都忙於『砌俄羅斯方塊』，我就梗係第一時間洗白白喇！

早出晚歸的一日，同樣一點幾至 ZzzZzz

（待續）

行程嘅第二日係星期六

血拚 Chatuchak (JJ market) 係呢日嘅主要節目，這個週末市集，面積有 80 多個足球場大，過萬個檔口，貨品種類五花八門，要穿梭其中，都要一定體力，向 JJ 進發前，當然要先醫飽個五藏廟喇！

昨夜臨瞓前，大家已經傾好，呢日嘅早餐會去鄰近酒店嘅 Peninsula Plaza 嘅 Provence 食個好出名，三十幾蚊（135 baht）嘅魚蛋粉，仲講到鬼咁開心 … 旅遊書註明十點營業 …. 我哋 0945 係酒店行過去（唔使五分鐘）…

喔！坐下，影影相 … 十點，無人招呼，侍應嘅眼神仲怪怪的 … 經追問下，始知是十一點至營業，怪不得侍應報以不友善眼光，覺得我哋攪攪震無幫襯喇 … 一早食咗個『閉門羹』添！！

唉！呢日嘅時間好緊迫嘛，無端端係這兒 hea 咗半粒鐘 … 決定去到 JJ 至食早餐！

乘搭 BTS (Ratchadamri → Mo Chit) 前往 JJ 都要大半個鐘 …

先搵食，平價魚蛋粉，好好味o架！不過環境就差ｄ，好熱呀！邊食邊滴汗

食完嘢，就緊係開始 shopping 喇！行到兩點幾，唸住搵番之前幫襯過嘅泰國菜餐館，點不知兜咗幾轉都搵唔到，最終都要放棄，只隨意係路邊檔醫肚 … 四點幾，攰攰地，係 MangoTango 食甜品，小休一會 … 再繼續 shopping，約七點離開 JJ。

點解咁早走？？因為我哋要趕下場呀！

今日都有ｄ收穫o架！

 一碟一碗共 650 baht

 坐檯燈 250 baht

先返回酒店梳洗換衫（十二月都成卅幾度，超熱，行完 JJ 成身臭汗 ），因為我哋呢晚會去 C’est Bon 嘆法國菜

Address: G/F, President Tower Arcade, Intercontinental Bangkok Hotel

點咗 set dinner (990 baht + 10% service charge + 7% government tax) x 3

以 ~HK$300 係一個環境舒適兼食一個 9 道菜嘅法式 dinner 來講，可說是超值；當中最失色、最令我哋失望嘅係甜品囉！心太軟，個心居然凍咗，有無搞錯呀！

1. Manguro tuna with sesame, lemon, dill & wasabi dressing
2. Pan fried goose liver with raspberry sauce
3. King clams & mussels served with garlic, chili, tomatoes & white wine cream sauce / Green cos salad serves with bacon & croutons, parmesan cheese dressing
4. Pumpkins cream soup with croutons / Lobster cream soup with cognac
5. Sorbet
6. Spaghetti with crispy bacon, garlic & chili
7. Grilled salmon served with pesto sauce  / Roasted Australian rack of lamb served with ratatouille, rosemary sauce
8. Warm chocolate cake with vanilla icecream
9. Coffee / Tea

 細細粒最喜歡嘅 3 道菜

食完餐法國菜都已經十一點幾，四周店舖多關了門，慢慢步回酒店吧！

呢晚同樣接近零晨兩點至瞓 …

吖！我哋係酒店前往 C’est Bon 沿途影咗ｄ相

（待續）

十二點幾抵達 BTS Chit Lom 站，距離我哋今次下榻嘅五星酒店 Grande Centre Point Hotel & Residence Ratchadamri 其實只需約 10 分鐘步程，但因為不熟路，途中要問路，兜兜轉轉就花上了廿幾分鐘。

我哋入住 Grande Deluxe 房，面積有 44 平方米，不過實不相暪，呢間其實係二人房，因為買 package 時，Executive Suite（一廳一房，72 平方米）已 full booking，旅行社職員建議我哋『屈蛇』，據了解 GCP 屬 serviced apartment，即使 grande deluxe 都相當寬敞，房內另放有一張足以成為細細粒嘅床舖嘅貴妃椅，所以最終採納了屈蛇嘅建議。

我哋入住屬低層嘅 25 樓，景觀也十分開揚，面向廣闊嘅高爾夫球場；房間果然好闊落，更備有廚房、餐桌、微波爐、廚具、餐具、洗衣機、40 吋 LCD 電視、Fax 機等。

 呢張就係細細粒瞓咗三晚嘅貴妃椅

安頓好，都已經三點，當然係先出發醫肚喇！我哋打算去水門街嘅 Kaiton Pathumwan 食海南雞飯（09 年去到收咗鋪，無得食）；噢！今次又咁啱遇上收緊鋪（原來每日 1500-1700 係休市o架），無法喇！惟有幫襯附近另一間，點了一人一客海南雞飯（09 年係臨別前嚟過買外賣！），味道都相當唔錯。

食飽飽，先搵 SuperRich 兌換泰銖。離開時，係街口碰上賣『沙糖桔』榨汁，我哋好興奮呀！事關上次 09 曼谷行嘅最後一日曾經飲過，一飲就愛上，它比橙汁更好飲；今次嚟到，當然要一飽口福喇！

 晚飯後，仲買咗半打返酒店添！yummy

大家拿住支果汁邊行邊飲，話咁快就行到大型超市 BigC 嘅所在地，不過 BigC 就唔見咗，因為數月前被暴徒縱火焚毀嘅 BigC，因為結構受損，需要拆卸，眼前只剩一個地盤。

之後過到對面嘅百貨公司 Isetan & Central，據知它們同被暴徒破壞過，經一輪翻新後，大部份商店已重新開業；不過相連嘅 Zen 就依然封著圍板，未能重開，我哋係ｄ畫滿圖畫嘅圍板前影咗ｄ相。

行到攰攰地，當然要去 Chaho 抹茶店坐下喇！09 年在誤打誤撞之下喝過 Chaho 嘅綠茶豆奶、乳酪後，對那味道仍念念不忘；大家於出發前，早就講明一定要再來一次。

＊ 今次試咗曲奇、紅豆芝士餅、cappuccino

充完電，繼續 shopping；商場聖誕氣氛濃厚，我哋邊行邊影相 …

＊ 大家係第一日就有收獲，包括 boots、蝴蝶袋、內衣褲、零食

 阿哈呢日最開心係買咗呢 3 支蘋果汁

行下食下，不經不覺已九點，店舖陸續關門，所以我哋隨意係商場內搵咗間拉麵店醫肚，味道一般喇！

晚飯後，細細粒要求返酒店休息，皆因整天都頭赤赤，痛都想嘔，但為免影響佢哋兩個興緻，所以一直沒有出聲 … 一返酒店即食咗粒特效必利痛，唔使半粒鐘，舒服晒！

呢日晨早起身出發，以為早ｄ返酒店會早ｄ瞓 … 3 個死黨走埋，話題不盡 … 傾下講下，零晨一點幾至瞓。

（待續）

10/12/2010 細細粒跟兩位旅伴 harmony & grace 約好 0700 機場見，小妹同阿哈先後到達 …

有驚無險嘅事就發生：高妹竟然唔知醒 … 0655 細細粒打電話比佢，噢！benny 接電話？！？哎呀！嘈醒咗佢添，真係唔好意思 …

十多分鐘後，benny 來電稱高妹剛上了的士，趕緊嚟！原來佢唔知醒呀！

小妹跟阿哈都心急如焚，先向 counter 問問最後 check in 時間 … 0735，我倆唸到萬一趕不及，惟有將佢個喼棄置，改為 hand carry，於是預備了幾個環保袋 …

好彩 … 最後一秒趕到，無誇張，真係最後一秒，counter 職員正準備撤退之際，高妹拉著行李飛奔著，最終趕及，真係一額汗！！實在要多謝個位的士司機，由康山到機場只用上廿五分鐘，勁！

查實高妹都係情有可原嘅，事關佢要忙於準備搬屋，晚晚都半夜三更至有得瞓，唔攰就有鬼喇！

跟 09 年一樣，乘搭 OX 0855 航班飛往曼谷新國際機場 Suvanabhumi International Airport

不過今年我哋抵達曼谷後，決定唔做伸手派，因為新機場鐵路，在 2010 年 8 月 12 日泰國皇后生日已正式營運；不用再費周章找的士出市區酒店，亦不怕言語不通引起誤會，交通上的煩惱一掃而空！

領取行李後，一路順著「Train to City」的指示牌去到 B 層，就可以搭機場快線 City Line 了。到售票機買票，分別是賣 Express (紅色線) 及 City Line (藍色線)。City Line，費用是 15 銖，即港幣四元，超平！全程 30 分鐘，搭到終站 Phaya Thai 便有天橋直駁至 BTS，之後就真係想去邊都得。比起時時塞車及動輒三四百銖嘅的士實在方便、便宜，相信可令曼谷更受自由行旅客的歡迎。

細細粒對機場鐵路又並非有讚無彈，個人認為遊客去程時搭就無問題，但回程就有所保留；因為由鐵路到 BTS，沿途需多次上落樓梯，並無升降機之類嘅協助，真有點兒吃力！ 去程個喼唔太重，還可以；回程，就咪囉！無謂攞苦嚟辛喇！

機場鐵路資料：

分兩條線 SA Express 和 SA City Line。

SA Express Line：屬快線，不停站來回機場同市區嘅 Makkasan 站，全程只需 15 分鐘，收費 150 銖 (約 $36)。

SA City Line：合共有 8 個站，包括機場、Lad Krabang、Thab Chang、Hua Mark、Ram Khamhaeng、Makkasan、Rajprarop、Phaya Thai，全程 30 分鐘，都快過坐的士，收費平好多，只係 15 至 40 銖 ( $3.6 至 $9.6)，便宜到你不相信！而每隔二十分鐘就有班次開出，相當頻密。終站 Phaya Thai 落車最方便，有天橋連接地鐵 Phaya Thai BTS 站。

（待續）

豉汁白鱔煲仔飯

天寒地凍，最啱食煲仔飯，一於自己炮製一煲

再加碟油菜，暖笠笠又一餐

yummy yummy

前晚，狒狒來電約星期六食飯，細細粒當然要應約喇！事關阿狒可以係星期六出嚟飯聚嘅機會係萬中無一，皆因週六係佢最忙嘅日子，由朝到晚需應酬一班米飯班主，既然咁難得，一於搵埋近月變身為揍仔婆嘅 elaine 至得，喔！佢又一口答應喎！

天寒地凍，大家意願一致 …… 火鍋

點咗個四合一（$180），包括美國肥牛、帶子、龍躉片、蚌片，料靚，但份量少

送龍蝦湯底 ~~~~~~ 超級香，勁濃郁呀！！！

另外點咗四寶丸（龍蝦丸、墨魚丸、鯪魚球、豬肉丸）、三合一（雲吞、水餃、魚皮餃）、豆腐併鮮腐竹、油麥菜、雜菌併盆（秀珍菇、鮑魚菇、鮮冬菇）、鱔片

每人再加 $8 自助吧，任享各式飲料及糖水（紫米露、紅豆沙、芝麻糊、杏仁露）

我哋眼闊肚窄，食唔晒！

三個女人一個墟真係無講錯，我哋一坐埋就雞啄唔斷，加上有阿狒在場，嘈喧巴閉一定在所難免啊！！

未夠八點入座，大家傾到唔知時間，離開時已是十二點幾，埋單五百幾，好一個快樂嘅週末！

今日係高妹嘅牛一

生日飯局已安排咗係昨晚七點半，地點由壽星女選定了尖沙咀 iSQUARE 27 樓嘅『朝陽飯莊』，這兒居高臨下，可飽覽維港夜景，環境值得推介。最重要係我哋三個都無光顧過這個商場嘅食肆，真係好一個選擇！

細細粒 + harmony + 壽星女，三人點咗 6 樣嘢：

• 豆腐餃子  (要預訂)
• 王府井煲仔飯
• 竹笙上素
• 淆肉
• 酒釀丸子
• 拔絲香蕉

整體味道都唔錯，而且環境舒適，可以考慮再幫襯！！

由 CP Ester 推薦下，細細粒有機會參予這個為期一天半（一連兩個星期六）的工作坊，今日一整天跟其餘廿位『同路人』互相分享，雖然又要一再勾起 “那件事"，還在一連串的練習過程中淚如泉湧，但在心理學家馬博士（Helen Ma）的帶領下，透過「靜觀」，學習如何靜心如實深入觀察，好好照顧身心，處理生活壓力，面對挑戰，活得輕鬆自在。

過程當中，細細粒雖未能完全專注，只領悟（掌握）一點點，但至少學會了 3 個 『R』：

• Relax

• Release

• Return

於下週六前，細細粒需要透過一些練習繼續靜觀自療，並在下個半天工作坊中跟大家分享經歷；自己亦打算日後將自己學到的，跟自己的好朋友分享！

• 每天一次，隨光碟練習身體掃描 …

• 每天最少一次，靜坐五分鐘，溫柔觀察 …

• 下載鈴聲（http:// ….）到自己的電腦 …

• 步行時，著實地感覺 …

• 睡覺前，溫柔地 …

與 Grace 一齊報讀，將於二月廿八日開課