好嘢!今天是行程中最期待的一日,是自由行啊!
拿住張捷運一日票四圍騰
一早 0800 起床,視察過酒店嘅早餐唔啱胃口,決定出去搵食。行了好一陣子,發現大部份店舖還未營業,莫非台灣人不習慣外出食早餐??氹氹轉轉,走入東門路,看見一間地道食店“福滊”剛巧開舖,非常雀躍,我哋呢班百厭星,係人哋個爐灶又扮煮麵又影相,搞到個老闆娘唔知好嬲定好笑!接著一下子點了陽春麵、酸辣湯拉麵、鹵水豆干湯米、肉絲炒米、水餃、餛飩等制五臟,都只盛惠 NT$165,好味 超低!
食飽飽,係時候要起行,乘捷運由府中站出發,沿板南線 (永寧→昆陽),於忠孝復興站轉木柵線 (中山國中→動物園),用上半小時抵達木柵動物園 (NT$60,0900-1700)。這個被譽為亞洲最大的動物園是小芬的推介景點,有咩睇??答案是無嘢好睇!園區大而無當,人流多,動物少;深感被騙,加上烈日當空,決定看完那個聽講最有睇頭嘅「夜行性動物館」後立即離開,沒想到我哋四個同樣傻下傻下,無端端坐上了遊覽列車 (NT$5),氹咗上山頂,真係激死!大家又熱又渴,停下商量著,yuki 又被小食店吸引著,買了麻醬冷麵和果汁舒緩一下悶熱的心情!吃罷,“摩打腳”急步落山,找到夜行性動物館,繞場一周,又再失望而回,小芬真係大整古!!大家二話不說,向著出口快馬加鞭…足足花了三個小時,實在豈有此理!
離開動物園,乘捷運返回忠孝復興站,做咩?食晏囉!走進 sogo,咦!鼎泰豐,噢!排長龍,為免再誤時間,決定係美食廣場醫肚算了,一人來一客便當吧 (~NT$160@)!嘻!味道也不錯啊!接著,按原定計劃前往參觀袖珍博物館 (NT$180,1000-1800)。若乘捷運,可於木柵線南京東路站步行約 15 分鐘。唔係咁熟路,都係打的為妙。約 15 分鐘便到達,走進去,可以看到逾 200 件珍品,當中最有趣的莫過於動畫迷你電視、郵票大小的油彩真跡油畫等,不枉是亞洲第一座專門收藏當代袖珍藝術品的主題博物館,絕對值得一看!
踏出博物館,跳上的士,要求司機送往台北車站,並查詢一條專售賣廚具的街道,看來司機亦不太清楚,惟有落車後再問問路人,左穿右插,不果;winnie 好眼利,看見遠遠….不是廚具,而是一檔街頭小食,飛身撲去,買了一客八個小籠包 (NT$50),棟篤企慢慢嘆,超好食呀!順便問問老闆附近有否出售廚具的店舖,ricky 按他所指的方向走去,未幾,失望而回。決定不再耽誤時候,趕快步行至台北車站,乘捷運往淡水。
坐著,靜下來,大家都面露疲態,幸有 yuki 搞搞震,搞下氣氛,大家又再精神起來,有講有笑…之前都講過我哋幾個都係傻下傻下,果然無錯,今趟又再傻一次,無睇清楚,有車就上,結果上了北投為終站的列車,又要再過對面月台轉車…趁列車未到,係月台左影右影…車廂擠得滿滿,我哋幾個無聊嘅香港人指著車廂內的廣告說笑不停,突然兩位老人家搭訕,講廣東話!?!原來是早年留學後定居台灣的香港人,碰著我哋四個嘩鬼,兩老笑逐顏開,說過不停…
很開到了淡水站,嘩!人山人海。急急腳朝著淡水老街進發,開展小吃之旅,橫掃鹽酥菇、乳酪豬扒、白庶汁,真係飽到上心口,一於走入「信不信由你」的搜奇博物館,(週年優惠價 NT$59,原價 NT$180),一來停下個咀,二來滿足一下 yuki 的要求,博物館細得很,數十呎地方,一眼睇晒,至於好睇與否,則見仁見智!之後繼續掃街,吃了蚵嗲、巨無霸冰淇淋等,最可惜是馳名的「阿媽的酸梅湯」沒有營業 (之後聽小芬講,該店出售的酸梅湯懷疑有問題而被查封,哎喲!好彩無飲 )。攰攰地,搵間食店休息一下,順便食晚飯,揀了「楊鱻阿給」,點了鮑魚阿給、菜肉雲吞、香菇魯肉飯、鮮蝦雲吞湯米、灼菜等,當中以阿給最美味,一件四方形的豆腐,掏空後放入浸泡肉汁的粉絲,再以魚漿封口,蒸熟後淋上特製的甜辣醬汁,實在令人回味無窮!大飽口福後,再嘆杯庶汁,然後沿海濱公園折返捷運淡水站,前往忠孝敦化站,到誠品書店打書釘。由淡水站往忠孝敦化站前後共 23 個站,個 3 隻嘢坐足全程,ricky 還食飽睡一睡 zzz,而細細粒就企足咁耐,真係攰到想坐係地哩!
於書店逗留近一小時,沒有斬獲。接著打的往饒河街觀光夜市,不得不提今趟所搭嘅的士,好豪啊!不但舒適寬敞,前後座有電視,不過個司機看來太投入睇電視了,笑呵呵,我哋條命仔似乎…
這個夜市除了小吃外,還有很多攤擋售賣日常用品、服飾等,當地人及遊客川流不息,看著一街小食,winnie & yuki 好似已經將之前所吃的完全消化,雙眼發光,口水開始… 即使仍飽著肚子嘅我,亦被受影響,由街頭掃至街尾,狼吞炸蝦卷、韮菜餅、蚵仔煎、臭豆腐、牛排串燒、木瓜奶、蜂蜜苦瓜汁等…還未夠,仲要打包胡椒餅、蘿蔔絲餅回酒店再開餐,食量實在驚人啊!
2315 決定離開,原定打的回酒店,司機指要 NT$400 多塊,噢!太貴了!宜慳 d,趕快乘捷運吧 (尾班車 0000)!大家有講有笑下,近一小時的車程轉眼間過去,回到酒店,佢哋三個繼續開餐,我就開速梳洗 & zzz。
今日得出兩個字:喪食
睇過你的遊記,真係口水流,好想即刻去番一趟
你下次不妨去台中 d 牧場,風景非常靚,好舒服