第九天：2/6/2006 (星期五)
烏魯木齊 → (航機) → 西安
，西安 13—33°C 
【南山牧場、藏民家訪、國際大巴扎市場】
烏魯木齊 4—20°C ，西安 13—33°C 
07:45 morning call，但 06:30 比餓鬼 Bon 吵醒，佢話今日嘅早餐應該會好豐富，想早 d 刷餐飽，真係比佢激死。咦！果然係好正喎！我哋兩個嘆足粒半鐘。
雙眼依然佈滿紅根，就連個鼻亦開始好唔舒服，精神麻麻地。
上午來到位於海拔 2252 米，坐落南山冰峰雪嶺之間的南山牧場。好一個美麗的天然牧場，山坡上雲杉茂密參天，山谷的飛瀑清溪迂迴，豪邁躍馬馳騁於綠茵草原上。這裏空氣特別清新、乾燥和風較大，在猛烈陽光照射下還覺有點寒意。草原並非想像中的一望無際那種，卻有許多山坡，山坡上更長著密密麻麻的杉樹，看起來似一隻隻的恐龍爬在地上，景色相當有趣。山下還有許多蒙古包，好像來了蒙古一樣似的。
我們先走入哈薩克族家訪的毯房，聽聽他們唱唱新疆民歌、品嚐主人家奉上郁香的酥奶茶和土產水果，飲熱羊奶和吃乾果，感受濃厚又親切的新疆民情，他們的生活雖然不奢華，簡僕歸真，但自由自在，每人臉帶滿足的笑容。他們為人熱情、純樸、能歌善舞，身體充滿著音樂細胞。聽小黃講這裡的小朋友年紀輕輕，騎術已很了得；閒時會一起載歌載舞，悠然自得。可想而知馬匹和歌聲是他們生活中不可缺少的。
西瓜友 d 表演慾又發作，主動跟他們跳番幾 part 舞，但舞姿就不敢恭維了，騎呢！
之後有幾位團友選擇騎馬，其餘大部份則四周閒逛和拍照，只有我和阿 Bon 跑上山坡，一心想擠進羊群中拍照，小妹以為 d 羊只顧吃草，於是靜靜雞走近，原來牠們早已留意我的一舉一動，每當行近一步，牠們就退後一步，更不斷向我發出沉沉的“咩咩聲”，莫非投訴我打擾了牠們。但我仍不死心，把心一橫，叫阿 Bon 對好焦，我就飛撲過去，沒料它們雞飛狗走，我呢個傻瓜就係咁追，估唔到 d 羊可以走得咁快，追到我滿頭大汗，至於阿 Bon 就追住我，追得上氣不接下氣，好鬼搞笑！最後只好投降，作遠距離拍攝算了。
準時上車離開，發現魔王等一班人聚於車尾，捧腹大笑，原來 Timmy 正播放短片，片中主角居然係我，佢偷拍咗我和羊群嘅追逐戰，把小妹剛才動作古怪、無晒儀態，統統拍下，仲跟大家分享分享， 真難明佢哋一個二個點解咁鍾意拿我來開玩笑。
12:30 離開牧場，前往烏市的國際市集：大巴扎。由於只得 1 粒鐘時間，所以先前係車上已計劃好，第一時間搜羅具民族色彩的物品作留念及送予友人，之後當然係掃街，吃盡地道小食。
這兒洋溢著濃郁的民族氣息，身處其中，猶如觀賞西域風俗畫，這裡有大型的民族商品商場，也有小販小商店集中的集市，出售色彩絢麗、全毛手工織造的地毯、壁毯、繡花小帽、艾德力絲綢服裝等特色民族貨品。
我倆忘形地穿梭大街小巷，選購了幾個小數民族布公仔，拍了幾張街頭特色照。看看錶，噢！用上大半個鐘，哎呀！得番 10 分鐘咋！一支箭飛奔到熟食檔，打包咗 d 串燒。快 d 啦！遲到啦！兩個為食鬼狂奔，拿著一袋二袋，頭 nut 褲 nut，非常狼狽。喘晒氣，終於到達集合地點，臨上車前發現附近有賣烤餅嘅攤位，細細粒唔理咁多，調頭走去買烤餅，非常抵食，$2 一大個，我買了 10 個，小妹唔係生蟲，只係深明獨食難肥，有好嘢，梗係同大家分甘同味啦！人人有份，皆大歡喜，嘻！施以雕蟲小技，就唔使比團友責怪遲到啦！
於市區鑫都大飯店食過午飯，提早往機場。我們乘坐中國東方航空公司 UM2770 號班機按照原定時間起飛，17:00-19:55 從烏魯木齊拆返西安。
3 小時的機程，認識了鄰座的男士，稱阿 Lam，他是一位台灣人，用上 5 萬台幣玩了 12 天絲路。由於小妹國語不太靈光，只好雙語 (中英) 加上身體語言作溝通，其間交換相機，互相欣賞拍下的照片，談天說地，轉眼間已抵達西安，臨別前，他給我聯絡電話，叫我日後若到台灣旅行，可找他作嚮導，帶我食盡台灣美食，見他那麼熱情，我亦給他寫上我的電話，並跟他合照。團友們笑稱小妹有艷遇，有機發展異地情緣，吓！講笑吧！睇怕用忘年戀來形容比較恰當啊！
踏出機場，雨量極少的西安居然下起雨來，真係貴人招風雨囉！一如行程首日，行李由另一輛車先送返酒店，我們就往晚飯。
與闊別 9 日嘅阿娟再次見面，熱情如昔，口若懸河，滔滔不絕地介紹西安美食。
還記得第一晚抵達西安已是晚上 10 時多，當晚市內店舖差不多全部關閉，冷冷清清，今夜再次踏足，情況截然不同，人多車多，五光十色，還不時見到人群聚集，其實是街頭表演，非常熱鬧。
晚飯期間，小許給我們送上一個 8 吋高的兵馬俑，接著向各人收取小費 $600，果然係小財唔出，大財唔入。
不經不覺，今晚已是旅程中最後一夜。入住地點是行程第一晚留宿的西安建國飯店 (四星級)，返到 20330 號房已是 23:15，發現行李仍未送上，等呀等呀，半粒鐘仲係影都未見，依稀聽到走廊傳來一片嘈雜聲，原來大班團友走晒出嚟，議論紛紛，聽扮代表嘅陳生講，運送行李的貨車於機場附近撞咗，大堆李行拋出車外，小許正忙於安排，到 00:15 終於等到個爛皮 nut 骨嘅行李箱送到，細細粒都唔得閒理咁多，嗱嗱臨沖涼大昏迷。
｡。｡▫❤♡❤‥外星小美怡‥❤♡❤▫｡。｡ 
發表留言