第五天：29/5/2006 (星期一)
酒泉 → 嘉峪關 → 敦煌
， 敦煌 7—21°C
【夜光杯廠】【城樓、長城博物館】
酒泉 18—32°C ， 敦煌 7—21°C 
昨天小許已預告今天將會是十天行程中最艱辛的一天，仲話會有機會見到海市蜃樓，小妹好期待。
清晨 05:45 醒來，快速整裝待發。連日來，Bon 總比我早起，好奇怪，點解佢仲唔起身？於是還以顏色，扮鬼嚇醒佢。噢！原來係自己搞錯了 morning call 時間，遭 Bon 記屈咗兩樽礦泉水 (係 HK 空運過去，好矜貴架。)
今天天氣好好，藍天白雲，比較清涼。於酒店醫飽肚後，08:00 在酒店職員熱情夾道歡送下踏上征途。
上午繼續逗留酒泉市，參觀
一間酒杯製造廠，看看製造夜光杯的材料和製作過程。其實夜光杯是一隻由祈連山的石頭打磨成一隻晶瑩剔透的杯子。店員指越通透的夜光杯品質越是好，價錢也會越貴，每隻由數十元至數百元不等。大部份團友都買下數隻夜光杯作為一點手信，Bon 亦買了一隻盛惠 $90，只得我無買，並非孤寒，只是覺得又唔靚又沒有什麼用吧！
杯就無買，卻用 $150 買了一套 3 本的旅遊書：古道西風，當中包括講自然的張掖丹霞地貎、講歷史的敦煌雅丹地貎、以及用探秘形式帶你走進羅布泊。
買完書，團友仍在選購夜光杯，於是跟孖公仔走到樓下的書店逛逛，結果又破財，多買了兩本：西藏攝影旅遊指南、新疆遊記，價錢相宜，只 $56。
攞住大袋書上車，即時比班悍匪搶走，Timmy 和西瓜友搶先目睹為快，當知道小妹只用上 $200 餘買得該 5 本書，都表示超值。西瓜友想我割愛，將西藏攝影轉讓給他，傻嘅！我當然唔會應承，不過見佢愛不釋手，就借比佢 5 日咁多，回港時請物歸原主啦！
嘩！呢班團友都幾闊綽，一個二個都用上近千元買夜光杯，0麥真係咁值咩？
半小時車程，抵嘉峪關市
嘉峪關市與酒泉僅距 12 公里。抵達後第一站景點是建築於一片戈壁灘上的一座鋼城 ─ 嘉峪關。立於關城，雄視古絲路，很難想像到在如此荒涼的戈壁灘上修造如此規模的建築是何等艱難啊！
嘉峪關： 位於甘肅省西北部。是明代萬里長城的西起點一座雄偉城樓，也是全線長城中規模最宏偉、保存最完整的一座關隘。城樓始建於明朝，遙望祁連山脈，已有 600多年歷史，城樓上懸有「天下雄關」之橫匾。它的南面為祁連山，北面為龍首山，馬鬃山，與祁連山相峙，雄踞河西。關城高踞其間，兩側城墻橫穿戈壁，與兩山相連。形勢險要，自古為軍事要地。嘉峪關城樓，又稱為天下第一關，是由內城、外城、翁城、羅城、城壕組成三重敦，多道防線，形成重城井守之勢，構成一個堡壘森嚴的軍事防禦工程。
這裏有電動車接載旅客來回嘉峪關城樓，而我當然選擇徙步啦！來到嘉峪關城樓，最奇怪的就是這裏可以帶相機，但不可以帶手提攝錄機 (聽聞政策是朝令夕改的)。
登上城樓行走一圈，所需時間亦不少。阿 Bon 大大隻都表示好攰，但細細粒就毫無倦意。城樓上還可飽覽塞外壯麗美景。
離開城樓，上車前途經彷古步行街，團友爭先購買青瓜及蕃茄，小妹當然唔執輸，用 $5.8 買了幾個。反正早餐已消化得七七八八，距午飯地點玉門尚有兩小時車程，它們就大派用場。
車上人人都拿著紅紅綠綠的青瓜蕃茄 "趙呀趙"，場面都幾搞笑。就係各人忙於醫肚嘅時候，右手邊出現一個類似湖的東西，係沙漠地帶是極為罕見的，原來它是黑山水庫。
小妹很想將它拍下，一手拿著蕃茄，一手連忙拿起相機，手忙腳亂，在搖搖晃晃的車廂內，撲至右手邊，嘻！好彩都比我影到，不過就朦朦地。突然有團友大喊左前方有兩列火車啊！細細粒又趕快返回自己座位，可惜影唔到，仲好唔小心將個蕃茄“則”咗落牛魔王個頭上，細細粒連忙笑住 say sorry，好彩魔王無發惡，不過就乘機屈咗我一餐宵夜 ……。點止咁簡單、咁便宜我，之後仲 ……，下回分解。
行走個多小時，遇上修路工人罷工，阻擋去路，最終要小許落車請他們讓路，行程拖延近半句鐘。
14:45 終抵玉門鎮塞外春餐樂苑，食咗餐露天田園餐。飯後展開絲綢之路正正式式坐長途車 (約 9 小時) 的旅程。沿途的路段凹凸不平，令車子周不時震動，坐車尾的 Bon 記和我，拋上拋落，骨頭吃盡苦頭。咦！我帶咗頸枕同腰墊喎，點解會唔記得用架？傻瓜！
這裏所見的都是荒涼的戈壁灘，三危山風貌，沿途可欣賞到長期經風化侵蝕之雅丹地貌，維吾爾族語意險峻的土丘，水源主要來自祁連山的雪水。聽說在這些路段有機會碰到海市蜃樓或大漠孤烟？
連日來，每一餐，羊都難逃一劫，必被炆、燒、燴 …… 擺上枱，嗜羊嘅團友可大快朵頤，但點解佢哋不會覺燥熱呢？原來就係飲咗祁連山 d 雪水囉！
9 小時的車程，小許向我們清楚解釋了沙漠與戈壁灘的區別：
戈壁灘是戈壁灘，大沙漠是大沙漠，兩者的含意是不同的。自酒泉到敦煌，公路兩旁多是鋪著砂礫和卵石的大地，汽車一開就是幾百公里，無論你怎麼看，茫無邊際、粗獷、原始而豪放，這是戈壁，不是沙漠。純粹是細沙的才是沙漠。
窗外看去，大部份時間都沙塵滾滾，咪以為坐係車內可以置身事外，原來沙粒無孔不入，細細粒變咗“黃面婆”，眼耳口鼻、全身都舖滿泥沙，十足身體磨砂一樣，唔通呢種就係大漠風情？？
兩粒鐘後，司機從例停一停車，讓有需要嘅團友 ……，細細粒眼見車外風沙四起，為免被吹走，都係留係車內安全 d，係咁咦做幾下伸展運動。當團友陸續上車，我就肯定自己決定無錯，佢哋全身佈滿沙泥，免費吹咗個 06 年瘋癲新髮型，成個乞 e 咁，我和 Bon 記笑到攣埋個肚，仲幫佢哋影咗 d 大特寫，差 d 比市井佬拆我菲林，勁搞笑！
顛完一輪，繼續上路，不久左邊又出現水源，原來又係湖，不過唔知佢姓o麥名o麥，係陽光照耀下呈現“藍黃藍”三間色彩，一班攝影發燒友不理危險，一窩蜂撲向左邊窗，務求把它拍下。呵呵！小妹唔使郁，佔盡優勢，但唔代表可以拍得靚相，因為車不停搖，人不停擺，手不停震，好難影呀！
係呢個時候，小妹發現勾在車背的膠袋流出茄汁，閉！之前買嘅蕃茄撞爛晒，變咗茄醬，真係無眼睇！
突然，小許大喊：海市蜃樓呀！係好遠好遠個度呀！望似有 d 樹同埋有 d 水個度呢！快 d 睇啦！睇唔睇到呀？成團 33 人彈晒起身，指手劃腳，你一言我一語，有人話唔知邊度，有人話係喎！又有人話唔係卦！更有人話當自己睇到， o麥咁都得！其實，小妹都唔肯定自己睇見嘅係咪海市蜃樓，的而且確係無邊際的沙漠上睇到一灘水及一堆倒影，但卻有丁點兒懷疑呢？
繞道安西市，走上平坦的公路，團友昏昏欲睡。20:30 終於來到敦煌市郊，剛是日落時分，雪山亦跟我告別，取而代之是崑崙山。左邊可見敦煌機場，右邊遠眺柳園火車站，我們明晚就會坐兩小時車程往柳園轉乘火車啦！
敦煌之所以有「沙漠綠洲」之稱，是由於土壤肥沃、景色秀麗。它也是古絲路的總樞紐，在中西交通史上曾起過重要的作用，與酒泉、張掖、武威合稱「河西四郡」。
21:15 抵敦煌國際大飯店享用大漠風情宴，當中最有特色的是“雪山駱駝掌”，至於好唔好食就見仁見智。
是晚入住敦煌山莊 (四星級)，4004 號房。
個行李箱由黑色變咗啡色，嚇死人！
小妹過去幾日並無評論過任何一間酒店，但呢一間就不可不提，因為佢搞到我和 Bon 記無覺好瞓。(或者係我唔識欣賞吧！有團友極度興奮，紮紮跳。) 房間是別墅式，間隔是兩間雙人房 + 大廳為一單位，以古色古香設計，燈光昏暗，仲掛住兩幅繡著大量昆蟲的窗簾，門鎖又壞壞哋，結果同阿 Bon 有得震無得瞓，傾偈傾天光，真係攞命！
｡。｡▫❤♡❤‥外星小美怡‥❤♡❤▫｡。｡ 
發表留言