是日 
按原定計劃過大海。早上七時半 (較平日返工還要早起床) 於上環信德中心會合大隻 Bon、愛登士 Hedi 和搞笑 Angel。
抵步後，第一時間往漁人碼頭，沒料十時始營業，於是在四周閒逛影影相。
跟著，走進金碧輝煌，極盡華麗的金沙赌場，大隻 Bon 同細細粒亦入鄉隨俗，各自花了廿元拉老虎機，約十分鐘後，大隻 Bon 的老虎機突然響起音樂，他問我是否中了獎，此時，有賭場職員走近，並連忙向阿 Bon 說恭喜恭喜，原來他真的中了大獎，是 $5,000 ，我們非常雀躍，大隻 Bon 立即好豪氣，表示今天包起細細粒 ….. (唔好誤會，只是指包食費)。接過現金獎，我和阿 Bon 轉戰 「大細」，可惜細細粒「買大開細」輸掉 $100，收手。
接著，享用金沙自助餐醫吓個五臟廟，經一輪狂風掃落葉，大家都飽到行唔郁。
醫飽肚，折返漁人碼頭機動遊戲範圍，大家都感到有點兒失望，所以只逗留了廿分鐘便離開。細細粒忽然想起上次遊澳時，高妹推介的雞蛋餅，按捺不住立即走到市政廳某街角購買，嘩！熱辣辣香噴噴，好正呀！
之後 Hedi 提議往黑沙灣，在碼頭附近車站看到 10B 是合適車號，為求穩當起見，先後向站長和 10B 司機問過清楚始安心上車。上車後，我們喋喋不休，又忙著睇相，約十五分鐘後，車停下來，車內其他乘客都紛紛落車，我們仍然坐著，沒想到連司機也下車了，於是我們趕快下車，並追問司機是甚麼一回事，司機居然說這兒就是黑沙灣，我們哈哈大笑反問何解這裡一粒沙都冇，怎會是黑沙灣，司機急急腳走了。這時，Angel發現原來這兒是關閘。結果只有再轉乘 25 號前往，唔知點解，我哋竟然沒半點不快，相反還笑個不停。
於黑沙灣閒蕩半句鐘，「打的」返回市政廳九如方嘆下午茶，叫來木康布甸和三文魚梳乎厘。
接著再到 Gelato 外賣一杯西柚味雪糕，細細粒邊行邊吃，滿心歡喜直往大三巴/炮台。
5:30pm 姊妹們前往氹仔官也街買手信，各人滿載而歸，只有小妹最 "孤寒"，抄肥雞屎橋，把鉅記及咀香園拍下，聊表心意。
晚餐吃過誠昌水蟹粥 + 酥炸鯪魚球 + 炒花甲 + 椒鹽田雞 + 油菜。乘坐 7:30 船折返上環，結束這天瘋狂美食澳門一日遊。
｡。｡▫❤♡❤‥外星小美怡‥❤♡❤▫｡。｡ 
請問雞蛋餅是否市政廳旁的小賣呀?
澳門是有兩個黑沙灣的，多數人叫關閘附近的作黑沙，你太大意了，應問清楚是否去路環的黑沙灣才對。
到了官也街也不買晃記老婆餅，你比肥雞更寒。
無錯！好鬼香脆嘅雞蛋餅就係市政廳旁的小賣，$5 一大包，細細粒食咗 $10。
哎喲！真係烏龍，原來關閘附近又係叫黑沙，好彩我哋無鬧個司機，如果唔係比佢鬧番轉頭，咁就瘀死！多謝肥雞賜教。
我係官也街不但吃了晃記老婆餅，仲食埋莫義記芒果和菠蘿大菜榚(芒果好味啲)，只係食晒落肚無帶返嚟，細細粒食咁鬼多都唔肥，肥雞，你唔恨得咁多！
等漁人碼頭開得七七八八，搵日同你再去刷餐勁，你請！OK \(*o*)/